N’atru viaciu

 

Ppe n’atru viaciu signu preparatu
e a ru paise vaju n’atra vota;
ssu viaciu stanche, è longu, è fatigatu,
ma dintra u core canta allegra nota.

Vaju a truvare u sangu ch’è rimastu,
l’amici chi n’un sunnu mai partuti,
e chiddri chi te fàu benire u scastu,
chi a Merica hannu vistu e sù fujuti.

Vàu cuntanu papocchje a tutta a gente
e fannu paragoni stralunati;
a maggioranza coddre ca ‘un sà nente,
ma cride, ca li punti sù illustrati.

Na vota chi ssu pulice è ntr’a ricchja,
n’un c’è cchjù bersu d’u putì cacciare,
u chjudanu ccu mashcu e ccu naticchja
e prigioneru mmita s’à de stare.

Carminu, ‘n Cannatà, dice, cc’è jiutu;
ma d’i parenti ha avutu n’impressione!?
avie ra giobba, ma sinn’è benutu
ca n’un l’ere piaciuta la visione.

“Avìe truvatu subitu u lavuru!
ma ssu parente u core m’ha trafittu,
invece ‘e m’aiutà ppe nnu futuru,
tri misi e pò vulìe pagatu affittu”.

Michele ‘e Papaianni, chi ere ddrà,
ppe dire a sua pò trase ntr’u discursu,
ca iddru è statu puru ‘n Cannatà;
e ha lavuratu ‘n chenca nseme all’ursu.

“ Nu voshcu fittu e granne senza fine
e na paura ‘e lursi c’un cce cridi.
Appena m’haju vistu e sacche chjine,
tornai a cumprà na rroba chi ‘u r’abbidi”.

Me dicianu ca ccà cc’è l’assistenza
ccu l’accumpagnamentu a ogne malatu,
ca u dollaru è finitu ed è in cadenza
e, de valore, l’euru, ha surpassatu.

Ca ccà,puru chi ‘un pò cumprare pane,
cò chiddru chi stà bonu o tirunìe,
se fà, ogne annu almenu, due simane
a mare ppe sbagà sse malatìe.

Ppe ssi figli, speriamu Ddiu pruvide,
e fina chi campamu, io, l’aiutu;
ma si pò la cecata ‘un me surride,
casa pulita lassu e senza mutu.

All’interesse vue siti attaccati
e ri figli mannati a lavurare;
ccu nnue cc’è stannu i shchetti e ri spusati
e nuddru, mai, l’affittu ha de pagare.

“Si!”, dice nu signore, tutti sannu
ca figliuma, a trenta anni laureatu,
‘un pò truvà lavuru! e dduve u mannu?
se stà ccu mmie fina chi è pensionatu!.

 

20-04-2011