A chjazza ‘e na vota

 

A chjazza ‘e na vota

 

Si cce pensu, certe vote,

quannu tornu arreti, mmente,

u penseru sempre rote

a ra chjazza chjina ‘e gente.

 

Cuhjjentare e bascitane

a vinnire cuddrureddri,

ficulinnie e ficazzane,

pimmadori e cucuzzeddri.

 

A ssa chjazza de na vota,

tanti tipi ‘e negozianti,

s’u cunsati tutti a rrota,

paisani ed ambulanti.

 

Mmprima fila cc’È Marianu,

tricchi tracchi e fruguliddri;

nu negoziu sanu sanu,

caramelle e jocareddri.

 

Si te fermi ppe guardare

o nsiammai azi na manu!

“Statte fermu! N’un tuccare!

Vavatinne! Vascia a manu”!

 

Si de ddra’ te giri arreti

negozianti de pretese,

soppi soppi, queti queti,

s’u Gagliardi a Genovese.

 

N’orificiu cc’È cchiu’ avanti,

ma de intra mai cambiatu,

ssa menzina ‘e negozianti,

po’, la chjude Pettinatu.

 

Supra a destra, po’ passamu

d’i caduti u marmu finu

e spettabile truvamu

u negoziu de Guerinu.

 

D’a caserma sberti sberti,

arrivamu ‘ntabacchinu

tra i giurnali e ri fumetti,

te cumpare Pasqualinu.

 

Se continue senza scalu

fina dduve u zoppareddru,

ma ‘un fissiare, ca ssu palu

te scuffune ru cerbeddru.

 

A ra destra versu a fine,

cc’È Rafele dettu Rose;

ppe sse fare e sacche chjine,

mu’ se misu a fa’ due cose.

 

De rimpettu, a ra vutata,

Saccumannu alimentare,

doppu fattu ssa girata,

piglia a via ppe riturnare.

 

Trasi ntra sse quattru mura,

nu vancune e ancunu settu,

vegetabili e birdura

sempre frischi ddue Rucchettu.

 

Ppe chjudire a caminata,

ammiramu, e mmenzu a via,

professione delicata,

Rondinella sartoria.

 

Negozianti e binnuleri,

remurata ‘e tanta gente;

sunnu tutti strusci d’eri,

oje n’un se sente nente.

 

20-04-2011